هو عنده جيش .. وهي جالها عريس وبابا وماما مصممين يبقى الحب يروح فين؟؟

يا جماعة ينفع الحب في الزمن ده يعيش ؟ .. لأ طبعا .. ( ليه يا فقري ؟..) هقولك بس اصبر ومتزقنيش ..
في الأول .. نقول إحنا عايشين إزاي وبعدين نشوف ينفع الحب يعيش في الزمن اللي عايشين فيه.. ولا أحسنلة يروح ما يجيش ؛ وننسى بقا كلمة حب في زمن أغلبة خاينين.
عايشين إزاي؟ .. زعلانين من الدنيا والدنيا زعلانة علينا ؛ وطبعا مش فاهمين ..طيب تعالوا أقولكم قصدي إيه..
زعلانين من الدنيا علشان مبتديش عايز ولا محتاج .. بنحلم ونتعب وبعدين ..مافيش ؛ نجتهد ونذاكر ونتخرج .. ده لو اتخرجنا .. وبعدين على القهوة أكتر مننا متلأيش.
هو ده بس؟.. لأ طبعا .. بصوا كويس .. نحب ونخلص سنين وبعد الحب والإخلاص والمشاعر .. ابقا قابلني لو الحب يعيش.
أوضح أكتر .. ماشي .. وماله .. قال يعني مش فاهمين ولا شايفين ولاسامعين ولامجربين ؛الحب يعيش إزاي وفلوس مافيش؟! ..هنكلها بدقة وهيعيش .. روح ياواد انت وهي ألعبوا بعيد .. متزعلوش أوي كده .. أسمعوا بس ومتزقوش ؛ أولا أنا مش ضدكم لأني واحدة منكم ؛ بحس زيكم وبحب زيكم وبتألم زيي زيكم بالظبط.. آه والله العظيم
طيب .. بقول كده ليه؟! .. علشان كل حكاية قابلتها وشوفتها بتبتدي باتنين حلوين .. حبيبة جامدين .. بحبٍك و بحبًك وبعدها شهر وللا اتنين وللا حتى سنين .. وبعدين للحلال نجيب منين ؛ وتبتدي الأعذار .. أصل عندي جيش .. ده طبعا العاشق الولهان ؛ ولو وحيد ماما يقول أصل الظروف والدنيا وحال البيت .. ومش كده وبس.. لا في جمل أنقح يقولها البيه ..وعلى طريقة عماد حمدي يسبل ويعيش دورالشهيد ويتنحنح ويقولها بكل برود ..(أنت خسارة فيا)؛(أنت من كوكب نضيف وأنا من كوكب ... تاني ؛ لا عمري هعرف أطلعلك ولا عمرك هتقدري تنزليلي) وياسلام لو تقل العيار شوية كمان وعاش الدور وقالها (معاكي عشت في جنة بس مقدرش أظلمك معايا ؛أنت كويسة زيادة عن اللزوم ) ؛ وطبعا يقصد زيادة أوي عليه.
وبكده ضرب الباشا حوار خلوص بكلمة حنينة.. ياعيني عليه بيتعب والله ..
طيب يعني هم البنات اللي ملايكة.. لأ طبعا .. ده دول زي القطط يكلوا وينكروا ؛ إن كيدهن عظيم .. بنات حوا طبعا المقصودين....
تفضل البنت من دول تحب وتتنحنح وتاخد في دباديب وأرانب ؛ وده عيد حب وده ذكرى أول يوم شفنا فيه بعض؛ ودي سنوية حبنا وكهن بنات بقا.. ولب وترمس وذرة ؛ ويكع البيه الفييس .. وبعدين أصل جالي عريس وماما وبابا مصممين وسلام ياعم الحلوين ومعطلكش .. وطبعا طارت العصفورة يا مسكين .. وأدي دقني لو شاف ست الحلوين.. ده طبعا إلا إذا فك منها العريس ؛ هترجع هي ليلى ويرجع هو قيس ..
ها .. إية رأيكم ؟ لسه مني زعلانين ؟!
عموما كلمة حق لابد منها .. الناس بقت معظمها كده إلا ما رحم ربي ودول للأسف قليلين وأغلبهم مع الخاينين مظلومين .. للأسف
طيب ده أحنا ؛ أمال الدنيا زعلانة علينا ليه؟.. محدش سألني يعني ..أنتم نمتوا مني ولا إيه ؟!
ماشي خليني أطيب منكم و أقولكم .. أصل الدنيا مزعلها حالنا وتصرفتنا ؛ حزينة على اللي بقينا فيه ..إستسلام وخيانة وواقع مهين .. يبقى العيب فينا ونرميه عالدنيا .. ينفع كده يا شباب ؛ ده ربنا بيقول:
(لا يغير الله ما بقوم حتى يغيروا ما بأنفسهم ) ؛ وطبعا ده إحنا مش فالحين فيه..مبقيناش فالحين غير في الضحك والهزار والتظبيط ؛ مبقولش أن كله بسببنا بس برده مينفعش حتى لو الحال مش هو؛ نقول ما احناش لاعبين.. صح ولا إيه؟..
آدي أحنا وآدي الناس الخاينين و آدي الدنيا..
بالزمة يبقى الحب يروح فين !! .. في ال***الة طبعا يا معلم .. ولا ايه؟

يسلمو يا مان
تقبل احترامي وتقديري اليك